តើ START Cambodia គីជាអ្វី?
START Cambodia គឺជាគម្រោងនៃការផ្លាស់ប្តូរជាយុទ្ធសាស្ត្រដើម្បីការពង្រីកលទ្ធភាពទទួលបានការសិក្សា ការបង្កើននូវចំនួននិស្សិតដែលបន្តសិក្សាដល់ចប់ និងការកែលម្អលក្ខខណ្ឌសម្រាប់និស្សិតចម្រុះឱ្យទទួលបានជោគជ័យ។ នេះគឺជាគម្រោងកសាងសមត្ថភាពក្នុងវិស័យឧត្តមសិក្សាប្រភេទ Strand 3 ក្រោមកម្មវិធី Erasmus+។ គម្រោងនេះជំរុញឱ្យមានការកែទម្រង់រចនាសម្ព័ន្ធនៃវិស័យឧត្តមសិក្សានៅកម្ពុជា ដែលចាំបាច់សម្រាប់ធានានូវការផ្លាស់ប្តូរប្រកបដោយបរិយាបន្ន សមធម៌ក្នុងការទទួលបានឱកាសសិក្សា ការរក្សាបាននូវការសិក្សាកាន់តែរឹងមាំ និងអត្រាជោគជ័យក្នុងការសិក្សាកាន់តែខ្ពស់សម្រាប់ក្រុមនិស្សិតដែលងាយរងគ្រោះ។
ការផ្លាស់ប្តូររចនាសម្ព័ន្ធដែលចាំបាច់ទាំងនេះ នឹងត្រូវអនុវត្តដោយក្រសួងអប់រំ យុវជន និងកីឡា (MoEYS) ដែលជាអាជ្ញាធរកំពូលនៅឧត្តមសិក្សានៃព្រះរាជាណាចក្រកម្ពុជា, វិទ្យាស្ថានជាតិអប់រំ (NIE) ដែលជាស្ថាប័នបណ្តុះបណ្តាលគ្រូបង្រៀនថ្នាក់ជាតិ, និងគ្រឹះស្ថានឧត្តមសិក្សាឈានមុខចំនួន ៤ នៅកម្ពុជា រួមមាន RUPP, ITC, SRU និង UHST ក្រោមការសម្របសម្រួលពីសាកលវិទ្យាល័យ Groningen ប្រទេសហូឡង់ និងមានការគាំទ្រពីដៃគូអឺរ៉ុបចំនួន ៣ ដែលមានបទពិសោធន៍ខ្ពស់ក្នុងការគាំទ្រការផ្លាស់ប្តូរឆ្ពោះទៅរកបរិយាបន្ន និងភាពជា និស្សិតមជ្ឈមណ្ឌលគឺ AEET, UPM និង METU។
និស្សិតថ្នាក់បរិញ្ញាបត្រមកពី RUPP, ITC, SRU និង UHST នឹងធ្វើការរួមគ្នាជាមួយសាស្ត្រាចារ្យ និងអ្នកជំនាញឧត្តមសិក្សាផ្សេងទៀត តាំងពីការចាប់ផ្តើមអនុវត្តរហូតដល់ចប់គម្រោង។
ការសន្ទនា និងកិច្ចសហប្រតិបត្តិការដោយចីរភាពជាមួយវិស័យមធ្យមសិក្សាទុតិយភូមិ គឺជាលក្ខណៈពិសេសគន្លឹះមួយទៀតនៃគម្រោង START Cambodia។
ព្រឹត្តិការណ៍ដើម្បីផ្សព្វផ្សាយចំនួន ២៨ ដែលបានគ្រោងទុក ត្រូវបានរំពឹងថានឹងជួយផ្សព្វផ្សាយទៅដល់គ្រប់តួអង្គក្នុងវិស័យឧត្តមសិក្សា និងវិស័យមធ្យមសិក្សាទុតិយភូមិនៅកម្ពុជា ព្រមទាំងលើកទឹកចិត្តឱ្យវិស័យទាំងពីរនេះប្តេជ្ញាចិត្តក្នុងការរក្សាការកែទម្រង់ដែលជំរុញដោយគម្រោង START Cambodia។
គម្រោងនេះរំពឹងថានឹងផ្តល់អត្ថប្រយោជន៍ដល់ (១) សិស្សានុសិស្ស និងនិស្សិតកម្ពុជាទាំងអស់នាពេលអនាគត ជាពិសេសអ្នកដែលមកពីក្រុមងាយរងគ្រោះ (២) វិស័យឧត្តមសិក្សាកម្ពុជា (៣) វិស័យមធ្យមសិក្សាទុតិយភូមិកម្ពុជា និង (៤) សង្គមកម្ពុជាទាំងមូល។ ទន្ទឹមនឹងនេះ ការផ្តល់ឱ្យធនធានប្រព័ន្ធអប់រំ (ឧត្តមសិក្សា) លើសពីប្រទេសកម្ពុជាអាចយកទៅប្រើប្រាស់ដើម្បីជំរុញកំណើនប្រកបដោយចីរភាព និងសមធម៌បន្ថែមទៀតក្នុងការទទួលបានការអប់រំនៅកម្រិតឧត្តមសិក្សា ហើយតាមរយៈនោះទទួលបានការងារសមរម្យ។
តើយើងចង់សម្រេចគោលបំណងអ្វីខ្លះ?
គោលបំណងទូទៅនៃគម្រោង START Cambodia គឺ៖ ជំរុញការកែទម្រង់រចនាសម្ព័ន្ធនៃវិស័យឧត្តមសិក្សានៅកម្ពុជា ដែលចាំបាច់សម្រាប់ធានានូវការផ្លាស់ប្តូរប្រកបដោយបរិយាបន្ន សមធម៌ក្នុងការទទួលបានការសិក្សា ការរក្សាបាននូវការសិក្សាកាន់តែរឹងមាំ និងអត្រាជោគជ័យក្នុងការសិក្សាកាន់តែខ្ពស់សម្រាប់ក្រុមងាយរងគ្រោះ។
គម្រោង START Cambodia មានគោលបំណងជាក់លាក់ទាំងបួន ដូចខាងក្រោម៖
១. បំពាក់បំប៉នតួអង្គសំខាន់ៗ ដែលគាំទ្រដល់សិស្សានុសិស្សនាពេលអនាគត (ជាពិសេសសិស្សមកពីក្រុមងាយរងគ្រោះ) ក្នុងការត្រៀមខ្លួនសម្រាប់ការផ្លាស់ប្តូរដោយជោគជ័យទៅកាន់ឧត្តមសិក្សា ក្នុងអំឡុងពេលមធ្យមសិក្សាទុតិយភូមិ ដោយផ្តល់នូវព័ត៌មានស្របចំណូលចូលចិត្ត ធនធានបង្រៀន និងធនធានអភិវឌ្ឍវិជ្ជាជីវៈជាប្រចាំ (CPD) ដែលត្រូវបានរៀបចំឡើងជាពិសេស។
២. ដាក់បញ្ចូលការច្នៃប្រឌិតនៃកម្មវិធីសិក្សា សំដៅពង្រឹងនិស្សិតឱ្យបន្តការសិក្សា និងជោគជ័យក្នុងការសិក្សា ទៅក្នុងមុខវិជ្ជាសិក្សាឆ្នាំទី១ នៃកម្មវិធីបរិញ្ញាបត្រ STEAM (វិទ្យាសាស្ត្រ បច្ចេកវិទ្យា វិស្វកម្ម សិល្បៈ និងគណិតវិទ្យា)។
៣. បង្កើតផែនការ និងរចនាសម្ព័ន្ធគាំទ្រនៅកម្រិតស្ថាប័ន និងកម្រិតកម្មវិធីសិក្សា ដែលចាំបាច់ដើម្បីធ្វើឱ្យការផ្លាស់ប្តូរទៅកាន់ឧត្តមសិក្សាមានលក្ខណៈបរិយាបន្ន ជាពិសេសសម្រាប់និស្សិតមកពីក្រុមងាយរងគ្រោះ។
៤. បង្កើតយន្តការសម្រាប់សមត្ថកិច្ចឧត្តមសិក្សាកម្ពុជា អ្នកបង្កើតគោលនយោបាយស្ថាប័ន សម្រាប់និស្សិតមកពីក្រុមងាយរងគ្រោះ និងសាស្ត្រាចារ្យ ដើម្បីចូលរួមក្នុងកិច្ចសន្ទនាថ្នាក់ជាតិ និងសកម្មភាពរួមគ្នាដែលផ្តោតលើការរក្សា និងពង្រីកការកែទម្រង់រចនាសម្ព័ន្ធ។
បណ្តាញសមាជិក
គម្រោង START Cambodia ត្រូវបានអនុវត្តដោយក្រសួងអប់រំ យុវជន និងកីឡាកម្ពុជា សាកលវិទ្យាល័យកម្ពុជាចំនួនប្រាំ និងស្ថាប័នដៃគូអឺរ៉ុបចំនួនបួន។
ដៃគូខាងកម្ពុជា៖
ដៃគូខាងអឺរ៉ុប៖
ទំនាក់ទំនង
អ្នកសម្របសម្រួលគម្រោង៖ បណ្ឌិត María Yárosh នាយិកាបណ្ឌិតសភាអន្តរជាតិ Tuning នៃសាកលវិទ្យាល័យ Groningen ប្រទេសហូឡង់
START Cambodia Erasmus+ project: 101235749